Денсаулық сақтау дайындау бағыты бойынша оқу-әдістемелік бірлестігінің кезекті отырысы
2020 жылдың 30 сәуірінде «С. Ж. Асфендияров атындағы Қазақ ұлттық медицина университеті» КЕАҚ базасында Қазақстан Республикасы Білім және ғылым министрлігінің Республикалық оқу-әдістемелік кеңесінің Денсаулық сақтау – дайындау бағыты бойынша оқу-әдістемелік бірлестігінің (ОӘБ) кезекті отырысы бейнеконференция форматында өтті.
Отырысқа ОӘБ-ның 70-тен астам мүшесі, Қазақстан Республикасы Денсаулық сақтау министрлігінің, медициналық жоғары оқу орындарының, медициналық факультеттермен ЖОО-ның, Назарбаев Университетінің, Денсаулық сақтау саласындағы республикалық орталықтардың, сондай-ақ медициналық ұлттық орталықтар мен ғылыми институттардың өкілдері қатысты.
Кезекті отырысты ОӘБ төрағасы, Басқарма Төрағасы – «ҚазҰМУ» КЕАҚ ректоры Т. С. Нұрғожин алғы сөзімен ашты.
Отырыста даярлаудың барлық деңгейіндегі онлайн оқыту бағдарламаларының өзекті мәселелері, жоғары және жоғары оқу орнынан кейінгі медициналық білім беру бағдарламалары бойынша оқуға қабылдау-2020, оқытудың қазіргі заманғы әдістері мен инновациялық технологиялары, 2019-2020 оқу жылында медициналық ЖОО аралық және қорытынды аттестаттауды өткізу, сондай-ақ клиникалық базаларды аккредиттеу және «Қазақстандық медициналық кеңес » медициналық білім және ғылым ұйымдарының ассоциациясы» ЗТБ-мен ынтымақтастық сұрақтары қаралды.
Мәселелер бойынша баяндамашылар «Қарағанды медицина университеті» КЕАҚ академиялық жұмыс жөніндегі проректоры В. П. Риклефс, «ҚазҰМУ» КЕАҚ қабылдау және кәсіптік бағдар беру басқармасының басшысы С. С. Искакова, «ҚДСЖМ» Қазақстандық медицина университеті» ЖШС білім беру және ғылыми қызмет жөніндегі проректоры А. А. Кауышева, ҚР ДСМ ДСДРО Білім және ғылымды дамыту орталығының басшысы В. В. Койков және ОӘБ атқарушы директоры В. И. Ахметов болды.
Отырыс барысында ОӘБ мүшелері медициналық білім беру және ғылым ұйымдарында қашықтықтан оқыту аясында оқу процесін оңтайландыру тәсілдерін талқылады, сондай-ақ әріптестерімен өз тәжірибелерімен бөлісті.
