Арманым – Алматы кардиохирургия орталығын халықаралық деңгейге жеткізу
Халықтың өз таңдауымен «Қазақстандағы 100 жаңа есім» жобасының жеңімпазы атанған дәрігерлердің саны 20-ға жуық болса, соның 10-ы алматылық ақ желеңді абзал жандар. Солардың қатарында Алматы жұрты үшін ғана емес, жұдырықтай жүрегі сыр беріп, Алматыға шипа іздеп, еліміздің басқа аймақтары мен алыс-жақын шет елдерден келген науқастардың да сүйікті дәрігеріне айналып, «Жүрекші» деген атқа ие болған кардиохирург дәрігер, қалалық кардиология және кардиохирургия орталығының бас дәрігері, медицина ғылымының кандидаты, Ресей медицина академиясының аттестацияланған профессоры Алмат Тұрысбекұлы Қодасбаев та бар. Жуырда Алматы қалалық Ішкі саясат және Жастар саясаты басқармаларының ұйымдастыруымен Елбасының «Болашаққа бағдар: рухани жаңғыру» бағдарламасы аясында С.Ж.Асфендияров атындағы Қазақ Ұлттық медицина университетінің студенттері Алмат Қодасбаевпен кездесу өткізді. Кездесуді университет ректорының тәрбие ісі жөніндегі орынбасары Убайдулла Датхаев жүргізді.
Нұржамал ТЕГІНБАЙҚЫЗЫ
Алмат, ең алдымен, өзінің болашақ ізбасарларына мамандық таңдауы, білім алып, қазіргі деңгейге жетер жолындағы ізденістері мен дәрігер болып жұмыс істеген алғашқы жылдары басынан өткерген қиындықтары туралы әңгімелеп берді. Алмат Тұрысбекұлының айтуынша, ол туып-өскен ауылда жоғары білім алған дәрігер болмаса керек, ауылдағы адамдардың басы ауырып, балтыры сыздай қалса, бар сенетіндері ауылдық фельдшерлік пункттегі жалғыз фельдшер Елмат аға ғана болса керек. Соған қарамастан, ата-аналар балаларының адам өмірін қорғайтын дәрігерлік мамандықтың емес, зоотехниктің оқуын оқығандарын көбірек қалайды. Қазақы пайым малдың басында жүрсе жаман болмас дегендері болар, оның үстіне Алмат туып-өскен Төлен Қабылов атындағы қой совхозына бастық болып келгендердің көбі зоотехниктің оқуын бітіріп келгендер екенін білетін ырымшыл қазақ баласының да бастық болғанын қалағаны болар. Алматтың да әкесінің таңдауы зоотехник мамандығы болыпты. Бірақ жасынан айтқан бетінен қайтпайтын, өнер десе, спорт десе ішкен асын жерге қоятын Алматтың бар арманы ауыл фельдшері секілді ауыл адамдарының денсаулығын қорғау болатын. Ақыры Алмат әкесі мен анасына дәрігер болғысы келетіндігін жеткізеді. Баласының айтқан бетінен тез қайта қоймайтын мінезін жақсы білетін әкесі Тұрысбек Алматқа ақ батасын беріп, Алматыға шығарып салады. Әкесінің ақ батасы, анасының сол ақ тілеуі қабыл болып, бүгінде Асының асқар асуларына қарап бой түзеп, сұлу табиғатына сүйсіне ер жеткен Алмат елге танымал кардиохирург-дәрігер. 600-ден астам қызметкері бар Алматы қаласындағы кардиохирургиялық орталықтың басшысы. Орталық жылына бес мыңға жуық адамның жүрегіне түрлі деңгейдегі оталар жасайды. Орталық дәрігерлері ашық жүрек жағдайында ота жасау әдісін дамытып, бір мезетте жүрек қызметіне қажетті бірнеше отаны қатар жасау мүмкіндігіне қол жеткізіп отыр. Өткен жылы бұл орталық 282 шет ел азаматтарына кардиохирургиялық көмек көрсетіпті. Жүз жаңа есім жобасының жеңімпазының әңгімесін қызыға тыңдаған студенттердің Алмат Тұрысбекұлына қояр сауалдары аз болған жоқ. Алмат жастарға дәрігерлік мамандықтың қиындығы мен сүйінер қуанышты сәттері туралы әңгімелеп берді. Дәрігер болу үшін адам бойында болуға тиісті қасиеттер жайында айтты. Дәрігердің ең басты құралы – дәрі мен пышақ қана емес, жылы сөз, науқастың жанын жылытар мейірімділік екендігін баса айтқан ол дәрігерлік мамандықты таңдаған адам, ең алдымен, бұл мамандықты шын жүрегімен қалауы керектігін, бойында төзімділік пен шыдамдылық, ең бастысы, жүрек жылуы болу керектігін, мінезге бай болуы тиісті екендігін айтты. Қазақстан кардиологтары ассоциациясының, Еуропа кардиологтары ассоциациясының толық мүшесі Алмат Қодасбаевтың әңгімесі болашақ дәрігерлерге үлкен ой салып, олардың өз мамандықтарына деген сүйіспеншіліктерін арттыра түскені анық.
– Біздің университетте тәрбиелік жұмыстарға көп көңіл бөлінеді. Бүгінгі «Қазақстандағы 100 жаңа есім» жобасының жеңімпазы университетіміздің түлегі Алмат Қодасбаевтың өмір, қызмет жолы, дәрігерлік қызмет жолындағы қол жеткізген жетістіктері туралы айтқан әңгімелері студент-жастарға үлкен өнеге болар тәрбие сабағы болды деп айта аламын. Жастарды сөзбен емес, осындай өнегелі адамдар үлгісімен тәрбиелеудің маңызы зор. Бұл кездесуден кейін кардиохирург болғысы келетін жастардың қатары көбейетіндігіне сенімдімін. Осындай кездесу ұйымдастыруға, жанымызда жүрген жақсы адамдармен жүздесуімізге ұйытқы болған Алматы қалалық Ішкі саясат және Жастар саясаты басқармаларына рахмет айтамыз дейді, – студенттердің тәрбие жұмысына жауапты проректор Убайдулла Маханбетұлы.
Университет ұжымы соңғы жылдары тәрбие жұмыстарына көп көңіл бөле бастағанын аңғаруға болады. Айтпақшы, жақында университет ректорының бастамасымен ата-аналар комитеті құрылыпты. Бұл да жаңа әрі жастар тәрбиесіне ортақ жауапкершілікті арттыруға негіз болар жақсы бастама екендігін айта кеткен жөн.
